विधानसभा निवडणुकीआधी महायुतीला मोठा धक्का, पहिला मित्रपक्ष बाहेर पडला!

NewsZenn Oct 16, 2024 278 0

पुणे : लोकसभा निवडणुकीमध्ये महायुतीने महादेव जानकरांसाठी एक जागा सोडली होती. परभणीमधून महादेव जानकर निवडणुकीच्या रिंगणात उतरले होते, पण त्यांना पराभवाचा धक्का बसला होता. लोकसभा निवडणुकीवेळीही महादेव जानकर महाविकासआघाडीसोबत जायच्या तयारीत होते, यासाठी त्यांची शरद पवारांच्या राष्ट्रवादीसोबत चर्चाही सुरू होती, पण शेवटच्या क्षणी महादेव जानकर यांनी महायुतीसोबत जायचा निर्णय घेतला होता.

विधानसभा निवडणुकीच्या तारखांची घोषणा झाल्यानंतर 24 तासांमध्येच महायुतीला पहिला धक्का लागला आहे. महायुतीमधून पहिला मित्रपक्ष बाहेर पडला आहे. आमदारकीची टर्म पुन्हा न मिळाल्यामुळे महादेव जानकर नाराज होते. महायुतीमधून बाहेर पडल्यानंतर महादेव जानकर विधानसभा निवडणूक स्वबळावर लढणार आहेत. राष्ट्रीय समाज पक्षाचे नेते आणि माजी कॅबिनेट मंत्री महादेव जानकर महायुतीच्या बाहेर पडले आहेत. आज झालेल्या महायुतीच्या पत्रकार परिषदेलाही महादेव जानकर उपस्थित नव्हते.

विधानसभा निवडणुकीची घोषणा

महाराष्ट्रामध्ये विधानसभा निवडणुकीच्या तारखांची घोषणा झाली आहे. 20 नोव्हेंबरला महाराष्ट्रात एकाच टप्प्यात सर्व 288 जागांवर मतदान होणार आहे. तर 23 नोव्हेंबरला विधानसभा निवडणुकीचे निकाल लागणार आहेत. 29 ऑक्टोबर ही उमेदवारी अर्ज भरण्याची शेवटची तारीख आहे. यानंतर 4 नोव्हेंबरपर्यंत उमेदवारांना त्यांचे अर्ज मागे घेता येणार आहेत.